In 2025, thuairiscigh 9% díobh siúd idir 20 agus 24 bliana d’aois gur chaith siad tobac gach lá. Ba é seo an céatadán ab ísle a tuairiscíodh don aoisghrúpa sin sa tréimhse a scrúdaíodh ó 2015 go 2025.
In 2024, thuairiscigh 70.8% de dhaoine óga idir 18 agus 24 bliana d’aois gur chaith siad níos mó ná dhá uair an chloig sa lá ar na meáin shóisialta.
Bhí sláinte mheabhrach ghinearálta fhéinbhraite measartha, maith nó an-mhaith ag 82.5% de dhaoine óga idir 18 agus 24 bliana d’aois in 2024.
In 2024, dúirt 78.7% de dhaoine óga idir 18 agus 24 bliana d’aois go bhféadfaidís cúnamh praiticiúil a fháil ó chomharsana go measartha héasca nó go han-éasca, agus dúirt 21.3% go bhféadfaidís é sin a dhéanamh le deacracht nó le deacracht mhór.
D’fhulaing beagnach trian (30%) de dhaoine óga idir 18 agus 24 bliana d’aois leithcheal in 2024. Díobh siúd a d’fhulaing leithcheal, níor ghlac 79% aon ghníomh.
In 2024, ní raibh sé d’acmhainn ag níos lú ná 1% de líonta tí ina raibh leanbh nó leanaí faoi bhun 16 bliana d’aois leabhair a bhí oiriúnach dá n-aois a cheannach.
In 2024, ní raibh sé d’acmhainn ag 5.9% de líonta tí ina raibh leanbh nó leanaí faoi bhun 16 bliana d’aois íoc as gníomhaíochtaí fóillíochta rialta amhail snámh, uirlis a sheinm, srl.
Sheol an CSO Mol Leanaí agus Daoine Óga i mí Feabhra 2025. Tugann an Mol rochtain éasca d’úsáideoirí ar na staitisticí is déanaí ar raon príomhthéamaí a bhaineann le leanaí agus daoine óga de réir mar a fhoilsítear iad ar ár dtairseach sonraí oscailte. Úsáideann an Mol ár dtairseach sonraí oscailte, data.cso.ie, nó PxStat, rud a chuireann ar chumas úsáideoirí sonraí atá ábhartha dóibh a chuardach, a íoslódáil agus léirithe amhairc a chruthú ar an mbealach is fearr a oireann dóibh. Cuireann struchtúr an Mhoil solúbthacht ar fáil chun sonraí nua a chur leis de réir mar a bheidh siad ar fáil, topaicí nua a chur san áireamh, agus nuashonruithe níos rialta a dhéanamh.
| Dianne Hillery | (+353) 1 498 5085 |
|---|---|
| R-phost | cyphub@cso.ie |
Trácht an Staitisteora
Tá an Phríomh-Oifig Staidrimh (CSO) tar éis nuashonrú ar an bhfaisnéis atá ar fáil ar ár Mol Leanaí agus Daoine Óga a fhoilsiú inniu (24 Meitheamh 2026). Feidhmíonn an Mol mar fhoinse aonair príomhfhaisnéise ar shaol leanaí agus daoine óga in Éirinn, agus úsáideann sé na sonraí is déanaí ón CSO agus ó chomhlachtaí seirbhíse poiblí eile.
Ag trácht di ar an Mol Leanaí agus Daoine Óga, dúirt Dianne Hillery, Staitisteoir i Stiúrthóireacht Staitisticí Sóisialta an CSO: “Cuimsítear i Mol Leanaí agus Daoine Óga an CSO táscairí a bhaineann le daoine óga in Éirinn thar raon leathan topaicí.
Cuimsíodh i nuashonruithe le déanaí ar an Mol roinnt táscairí maidir le bochtaineacht agus folláine leanaí. Is í Oifig an Chláir maidir le Bochtaineacht agus Folláine Leanaí i Roinn an Taoisigh a chomhthiomsaigh na táscairí sin. Tugadh le chéile iad ó fhoinsí sonraí éagsúla, rud a léiríonn a thuilleadh conas is féidir leis an Mol réimse staitisticí maidir le saol leanaí agus daoine óga a chomhthiomsú in aon áit amháin atá éasca a aimsiú. Tacaíonn na táscairí sin leis an Sprioc maidir le Bochtaineacht na Leanaí a leag an Rialtas síos in 2025 agus leanfar dá bhforbairt agus dá gcur i láthair ar an Mol de réir mar a bheidh sonraí ar fáil.
Cuireann sonraí ar fud an Mhoil ar ár gcumas a fheiceáil an bhfuil athruithe ar iompar daoine óga in Éirinn le himeacht ama. In 2025, thuairiscigh 9% de dhaoine óga idir 20 agus 24 bliana d’aois gur chaith siad tobac gach lá. Ba é sin an céatadán ab ísle a tuairiscíodh sa tréimhse a scrúdaíodh ó 2015 go 2025 don aoisghrúpa sin, agus ba é 25.4% in 2018 an céatadán ab airde.
Leanfar de shonraí nua agus nuashonraithe a chur leis an Mol. Cuireann an CSO fáilte roimh thuairimí agus moltaí ó úsáideoirí maidir leis an Mol, ar féidir iad a sheoladh chuig cyphub@cso.ie."